Ali Məhkəmədə xuliqanlıqda və qanunsuz silah gəzdirməkdə təqsirləndirilən Mətləb Süleymanlının barəsindəki qərardan verilən kassasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Ələsgər Novruzovun sədrliyi ilə keçirilən prosesdə qərar elan olunub.
Qərara əsasən, kassasiya şikayəti təmin edilməyib.
İttihama görə, hadisə 13 iyul 2023-cü il tarixdə, saat 00:10 radələrində Bakı şəhəri, Nizami rayonunda qeydə alınıb.
Belə ki, Mətləb Süleymanlı həmin ərazidə piyada hərəkətdə olarkən onunla üzbəüz piyada hərəkətdə olan, əvvəllər tanımadığı zərərçəkmiş Paşa Quliyevlə (adı, soyadı şərtidir) bir-birinə baxıb. Bu səbəbdən onların arasında mübahisə baş verib. Bu zamanı zərərçəkmişin qardaşı Mətləbin üz nahiyəsindən əli ilə vurub. Sonra təqsirləndirilən şəxs üzərində qanunsuz olaraq gəzdirdiyi bıçaqla Paşanın sol ayaq nahiyəsindən bir dəfə zərbə endirib. Zərərçəkmiş həmin yerdən qaçıb uzaqlaşmaq istəyən zaman Mətləb onun arxasınca qaçıb. Daha sonra Paşa yerə yıxılıb və təqsirləndirilən şəxs bıçaqla onun bədəninin müxtəlif nahiyələrindən bir neçə dəfə vuraraq, zərərçəkmişin sağlamlığa yüngül zərər vurmaya aid xəsarətlər yetirərək yetirib.
Hadisədən sonra Mətləb Süleymanlı saxlanılaraq cinayət məsuliyyətinə cəlb edilib.
Nizami Rayon Məhkəməsinin hökmü ilə o, 3 il 5 ay 28 gün müddətinə azadlıqdan məhrum edilib. Bakı Apellyasiya Məhkəməsi hökmü apellyasiya şikayətinə münasibətdə dəyişdirmədən saxlayıb.
Kamal Məmmədov
