Yaponiyanın İshikawa bölgəsində yetişdirilən və “Ruby Roman” adlanan üzümlər dünyanın ən bahalı meyvələrindən biri kimi tanınır.
Valyuta.az xəbər verir ki, hər bir üzüm dənəsinin qiyməti 26 ABŞ dollarından (təxminən 44 manat) başlayır və xüsusi partiyalarda bu göstərici 300 dolları (təxminən 510 manat) belə keçir.
Bu lüks meyvə ilk dəfə 2008-ci ildə satışa çıxarılıb. Həmin il 700 qramlıq bir salxım 100,000 yenə (təxminən 910 ABŞ dolları – 1,550 manat) satılıb. 2016-cı ildə isə 700 qramlıq başqa bir salxım üçün rekord qiymət – 1,1 milyon yen (təxminən 8,400 ABŞ dolları – 14,400 manat) ödənilib. Bu da hər bir üzüm dənəsi üçün təqribən 320 ABŞ dolları (təxminən 544 manat) deməkdir.
Ruby Roman üzümlərinin bu qədər bahalı olmasının əsas səbəbləri arasında çox sərt keyfiyyət tələbləri dayanır. Hər bir üzüm dənəsinin çəkisi minimum 20 qram olmalı, şəkərlilik səviyyəsi isə 18 faizdən aşağı olmamalıdır. Üzüm salxımlarının yalnız çox kiçik hissəsi bu “premium” standartlara uyğun gəlir.
Yüksək qiymətə malik bu məhsul əsasən Yaponiyanın lüks bazarları və hədiyyə sənayesi üçün nəzərdə tutulur. Ruby Roman üzümləri təkcə dadı ilə deyil, həm də eksklüzivliyi və prestij yükü ilə fərqlənir.
Mayya Hüseynova
