Cümə axşamından cümə səhərinə keçən gecə İsrail az adamın cəsarət edəcəyi addım atdı.
O, düşmənin ondan əvvəl silah çıxarmasını gözləməyib, ilk zərbəni özü vurdu. Çünki artıq vaxt yox idi.İsrail kəşfiyyatı xəbər verirdi ki, İran iki-üç həftə ərzində 15 nüvə döyüş başlığını tamamlaya bilər. On beş! Bu, təkcə Tel-Əviv deyil, bütün region üçün böyük təhlükə idi. Məhz buna görə də, saat 22:10-da (İsrail vaxtı ilə) İranda strateji, hərbi və nüvə obyektlərinə qarşı genişmiqyaslı " Am Kalvi" əməliyyatı başladı. Bu, artıq torpaq uğrunda deyil, varlıq uğrunda müharibədir..
İsrail Silahlı Qüvvələri Natanzdakı nüvə mərkəzini məhv etdi, yüksək rütbəli komandirlər zərərsizləşdirildi.Beş saat ərzində 200-dən çox İsrail döyüş təyyarəsi İranda strateji obyektlərə zərbə vurdu. Onlarla strateji məntəqə dağıdıldı: İslam İnqilabı Keşikçiləri Korpusunun (SEPAH) Təbrizdəki qərargahı, İran Ordusunun Baş Qərargahı və nüvə mərkəzi Natanz.
100 PUA və heç biri hədəfə çatmamaq
Gözlənildiyi kimi, İran cavab zərbəsi endirməyə çalışdı. İsrail ərazisinə doğru 100 pilotsuz uçuş aparatı (PUA) buraxıldı. Hədəf isə mülki obyektlər idi. Amma bu cəhd uğursuz oldu, PUA-ların heç biri hədəfinə çatmadı. Onların hamısı İsrailin hava hücumundan müdafiə sistemləri tərəfindən aşkar edilərək zərərsizləşdirildi. Bəziləri isə hələ İsrail hava məkanına daxil olmamış vuruldu.
Əməliyyatın başlanmasından səkkiz saat sonra İsrailin arxa cəbhə komandanlığı rəsmi açıqlama yaydı:
“Təcili zərbə təhlükəsi aradan qaldırılıb”.
Vətəndaşlara sığınacaqları tərk etməyə icazə verildi. Bu, itkisiz əldə olunmuş hərbi və texnoloji qələbə idi. Bu, bir daha göstərdi ki, yəhudi dövləti təkcə müharibəyə hazır deyil, həm də qalib gəlməyi bacarır.
MOSSAD Tehranın ürəyində...
Gecənin ən təsirli səhifələrindən biri isə MOSSAD-ın İranda həyata keçirdiyi xüsusi əməliyyat oldu. İsrail və Qərb kəşfiyyatının məlumatına görə, son aylar ərzində İran ərazisində xüsusi təyinatlı qruplar fəaliyyət göstərib. Onlar strateji obyektlərin yaxınlığında pilotsuz sistemlər və partlayıcı qurğular yerləşdiriblər.
Mərkəzi İranda MOSSAD agentləri zenit-raket komplekslərinin (ZRK) yaxınlığında yüksək dəqiqliyə malik silahlar yerləşdirib. Hava hücumu başladığı an bu sistemlər dəqiqliklə işə salınıb.Tehranın yaxınlığındakı İsfəcabad bazasında isə “Yer-Yer” tipli raket sistemi partladılıb. Bu raketlər İsrail şəhərləri üçün real təhlükə hesab olunurdu.
Üç istiqamətdən hücumun məqsədi İranın cavab zərbəsi endirmək imkanını tamamilə məhdudlaşdırmaq idi.
İran komandanlığının çöküşü
Son məlumata görə, Tehranın təcili cavab vermək imkanı yoxdur. Səbəb sadədir: İranın ordu idarəetmə sistemi tamamilə iflic olub. İlk 15 dəqiqədə 20-dən çox yüksək rütbəli zabit öldürülüb və qərargahda xaos hökm sürür. Parçalanmış şəkildə aparılan səfərbərlik cəhdləri ümumi bir strateji cavaba çevrilə bilmir. Məhz bu səbəbdən də deyə bilərik ki, bu müharibənin ilk raundunu İsrail qəti şəkildə uddu.
Beynəlxalq reaksiyalar və Livandan mühüm siqnal...
Dünya birliyi gərgin vəziyyətdədir. Amma ən diqqətçəkən məqam Livan hökumətinin "Hizbullah"a yönəlik xəbərdarlığı oldu:
“Livanı müharibəyə sürükləməyə haqqınız yoxdur”. İlk dəfədir ki, Beyrut açıq şəkildə terrorçu bir qurumdan məsafə saxlayır. Livan anlayır ki, İsrail öz vətəndaşlarını qorumaqda nə qədər ciddi və qərarlıdır. Bu da onu göstərir ki, artıq bir çox ərəb ölkələri İranın nüvə xülyasına görə ölməyə hazır deyillər.Netanyahu “Bəli, bu müharibə uzun çəkə bilər, amma biz dayanmayacağıq”,-deyib.
“Am Kalvi” əməliyyatı eskalasiya deyil. Bu, real təhlükəyə cavab idi, həyata keçməsinə cəmi bir neçə gün qalmış bir təhlükəyə. Diplomatiyanın mənasını itirdiyi, Xameneyinin “İsrail xəritədən silinməlidir” yazdığı bir dünyada İsrail sadəcə vacib olanı etdi. Yaşamaq üçün ilk zərbəni vurdu.
Bu gün İsrail dünyaya bir mesaj verir:
Biz müharibə istəmirik. Amma bizi seçim qarşısında qoyursunuzsa, biz qələbəni seçirik.
Biz sonadək döyüşəcəyik. Çünki bizim başqa yolumuz yoxdur.Yeni reallığa xoş gəlmisiniz! Bu reallıqda İsrail artıq qurban deyil. Öz taleyini özü yazan bir dövlətdir.
