BAKI, TurkicWorld
Avropa İttifaqı (Aİ), Rusiyaya sanksiyalardan yayınmaqda yardım etdikləri iddiası ilə Çin Xalq Respublikasına məxsus iki kiçik regional banka qarşı sanksiya tətbiq etməyə hazırlaşır.
TurkicWorld xəbər verir ki, sözügedən banklar Aİ-nin Rusiyaya qarşı hazırladığı 18-ci sanksiya paketinə daxil edilə bilər.
Brüssel bu maliyyə qurumlarının Rusiya ilə ticarət əlaqələrində Aİ-nin mövcud məhdudiyyətlərinin pozulmasına vasitəçilik etdiyini düşünür.
Sanksiyalar çərçivəsində Avropa İttifaqına üzv ölkələrin maliyyə institutlarının həmin banklarla tranzaksiya həyata keçirməsi qadağan olunacaq. Həmin bankların Rusiya-Çin sərhədinə yaxın ərazilərdə yerləşdiyi, lakin adlarının hələlik açıqlanmadığı bildirilir.
Aİ sənədlərində qeyd olunur ki, bu banklar Rusiyaya ixrac maliyyələşməsi və kriptovalyuta əməliyyatları vasitəsilə yardım göstəriblər. Onların Aİ sanksiyalarına məruz qalan malların idxalını asanlaşdırdığı və kriptoaktiv xidmətləri təqdim etdiyi vurğulanır.
Rusiya Xarici İşlər Nazirinin müavini Aleksandr Qruşko Aİ-nin yeni sanksiya paketinə münasibət bildirərək, Moskvanın buna cavab olaraq həm müdafiə xarakterli, həm də əks-təsirli tədbirlər görəcəyini açıqlayıb.
