2025-ci il iyunun 9-dan 10-na keçən gecə Rusiya ordusu Ukraynanın müxtəlif bölgələrinə genişmiqyaslı hava hücumu təşkil edib.
Tribunainfo.az xəbər verir ki, Ukrayna Hərbi Hava Qüvvələrinin məlumatına görə, ümumilikdə 322 hava hücum vasitəsi – əsasən “Şahed” tipli kamikadze dronları və müxtəlif tipli simulyator pilotsuz uçuş aparatları işə salınıb. Hücumun əsas istiqaməti paytaxt Kiyev olub.
Rusiya tərəfi həmçinin iki ədəd KN-23 ballistik raketi (Voronej vilayətindən) və beş ədəd “İskander-K” qanadlı raketini də buraxıb.
Ukrayna hava hücumundan müdafiə qüvvələri hücumu havadan və yerüstü zenit-raket kompleksləri, radioelektron mübarizə vasitələri, mobil atəş qrupları və pilotsuz sistemlərlə dəf edib.
İlkin məlumata əsasən, saat 09:00-a olan vəziyyətə görə, ümumilikdə 284 hava hədəfi zərərsizləşdirilib. Onlardan 220-si birbaşa atəşlə vurulub, 64-ü isə radarlardan itib.
Hücum nəticəsində zərər və tələfat barədə məlumat verilməyib.
İmran Kərimli
