Müasir dövrdə restoran seçimi artıq yalnız yeməyin dadı ilə məhdudlaşmır. Müştərilər təmiz mətbəxə, keyfiyyətli xidmətə, qida təhlükəsizliyinə daha çox diqqət yetirirlər. Buna görə də vətəndaşlar rəsmi yoxlama nəticələrinə əsaslanaraq seçim etməyə çalışırlar. Son dövrlər Azərbaycan Qida Təhlükəsizliyi Agentliyi tərəfindən bəzi restoranlarda aşkarlanan natəmizlik və gigiyena pozuntuları ictimai iaşə obyektlərinə nəzarət məsələsini yenidən gündəmə gətirib. Bu vəziyyət insanlarda “hansı restoranlara etibar etmək olar?” sualını yaradır.
Mövzu ilə bağlı Pravda.az-ın sorğusunu cavablandıran Azərbaycan Respublikasının Qida Təhlükəsizliyi Agentliyi (AQTA) restoranlar siyahısını təqdim etməsə də, ölkə ərazisində fəaliyyət göstərən ictimai iaşə müəssisələrində mütəmadi olaraq yoxlama və monitorinqlərin həyata keçirildiyini qeyd edib.
Bildirilib ki, istehlakçılara sağlam və təhlükəsiz ictimai iaşə xidmətlərini göstərmək üçün müəssisələrdə bir sıra qaydalara ciddi şəkildə əməl olunmalıdır.
“Qida məhsullarının hazırlanması, saxlanması və təqdimatı zamanı sanitar-gigiyenik normalara riayət edilməli, xüsusilə temperatur rejiminin qorunması təmin olunmalıdır. Qida bloku təmiz saxlanmalı, avadanlıqlar mütəmadi olaraq yuyulmalı və dezinfeksiya edilməlidir. Çarpaz çirklənmənin qarşısı alınmalıdır. Qeyd edək ki, Azərbaycan Qida Təhlükəsizliyi İnstitutunun peşəkar mütəxəsissləri tərəfindən ictimai iaşə müəssisələrində çalışan əməkdaşlara mütəmadi olaraq təlimlər keçirilir, onlara şəxsi gigiyena, zərərvericilərə qarşı nəzarət tədbirləri, təmizləmə və dezinfeksiya prosedurları, qida məhsullarının daşınması, saxlanması və düzgün emalı qaydaları ətraflı şəkildə izah olunur. İstehlakçılardan aldıqları məhsullarda hər-hansı uyğunsuzluq və şübhəli hallar aşkar edildikdə, dərhal Agentliyin “1003 - Cağrı Mərkəzi”nə məlumat verilməsi tövsiyə olunur”, - məlumatda qeyd olunub.
Şəhanə Quliyeva
