Vaşinqton və Kiyev rəsmilərinin Rusiya-Ukrayna müharibəsinə son qoymaq üçün Mayamidə keçirilən danışıqlar məhsuldar olsa da, bəzi mühüm məsələlər həll olunmamış qalıb.
Ölkə.az “The Wall Street Journal”a istinadən xəbər verir ki, tərəflər danışıqlar zamanı Ukraynada yeni seçkilərin mümkün vaxtı və Rusiya ilə Ukrayna arasında ərazi mübadiləsi perspektivi müzakirə edib.
“Digər mühüm suallar, o cümlədən Ukraynanın ABŞ və Qərbdən aldığı təhlükəsizlik zəmanətlərinin mahiyyəti və Kremlin genişmiqyaslı işğalın başlanmasından bəri işğal olunmuş ərazilərin beynəlxalq səviyyədə tanınmasını tələb etməkdə davam edib-etməyəcəyi hələ də həll olunmamış qalır”, - nəşr yazıb.
ABŞ dövlət katibi Mark Rubio danışıqlarla bağlı mövqeyini açıqlayaraq deyib ki, bu, təkcə sülh sazişləri ilə bağlı deyil: “Bu, Ukraynanı suveren, müstəqil və firavan edəcək irəliyə doğru yol yaratmaqdır və buna görə də bu gün daha da irəliləyiş əldə etməyi gözləyirik".
ABŞ prezidenti Donald Tramp bəyan edib ki, Rusiya-Ukrayna münaqişəsinin həlli üçün yeni plan üzrə Ukrayna ilə danışıqlar uğurla gedir. "Danışıqlar yaxşı gedir. Razılaşma əldə etmək üçün yaxşı şansımız var", - ABŞ prezidenti qeyd edib.
Bununla belə, cənab Tramp əlavə edib ki, müəyyən problemlər var və bu da Ukraynadakı korrupsiya ilə bağlıdır. “Bu, şübhəsiz ki, onlara kömək etmir”, - Tramp əlavə edib.
Qeyd edək ki, ABŞ prezidentinin xüsusi nümayəndəsi Stiv Uitkof və prezident Trampın kürəkəni Jared Kuşner danışıqları davam etdirmək üçün bu gün Moskvaya səfər edəcək. Onlar Moskvada Putinlə görüşərək Ukraynadakı sülh planını müzakirə edəcəklər.
Mürtəza
