Ukraynada Prezident Aparatının rəhbəri Andrey Yermakın ötən gün istefaya göndərilməsindən sonra Kiyevdə ən çox müzakirə olunan sual onun yerinə kimin təyin ediləcəyi ilə bağlıdır.
Modern.az xəbər verir ki, ABŞ-ın "Axios" nəşrinin jurnalisti Barak Ravid prezident administrasiyasındakı mənbələrə istinadən Yermakın mümkün varislərinin adlarını açıqlayıb.
Məlumata görə, əsas namizədlərdən biri Ukraynanın müdafiə naziri Denis Şmıqaldır. Jurnalistin iddiasına görə, Şmıqal Zelenskinin Aparata rəhbər gətirməyi düşündüyü ən real fiqurlardan biridir.
Digər iki güclü namizəd isə Ukrayna Müdafiə Nazirliyinin Baş Kəşfiyyat İdarəsinin (GUR) rəhbəri Kirill Budanov və baş nazirinin birinci müavini, rəqəmsallaşma naziri Mixail Fedorovdur. Prezident Zelenski şənbə günü hər üç şəxslə - Budanov, Şmıqal və Fedorovla yanaşı, Prezident Ofisinin rəhbər müavini Pavel Palisa ilə də görüş keçirib.
Mənbələr bildirir ki, əgər Şmıqal Aparat rəhbəri postuna təyin olunsa, Mixail Fedorovun müdafiə naziri vəzifəsinə gətirilməsi ehtimalı yüksəkdir. Yəni Kiyevdə təkcə bir kadr dəyişikliyi deyil, daha geniş rotasiya gözlənilir.
Zelenski bu gün Yermakın yerinə namizədlərlə məsləhətləşmələr aparacağını açıqlasa da, ad çəkməmişdi.
