Ukrayna Prezident Administrasiyasının keçmiş rəhbəri Andrey Yermak öz istefasını şərh edib və bildirib ki, istefaya baxmayaraq, Prezident Volodimir Zelenskini dostu kimi görməyə davam edəcək. O həmçinin Rusiya-Ukrayna müharibəsinin dayandırılması ilə bağlı ABŞ ilə aparılacaq sülh danışıqlarında iştirakını təsdiqləyib.
Milli.Az xəbər verir ki, bu barədə Financial Times məlumat yayıb.
Andrey Yermak qeyd edib ki, Prezident Ofisinin rəhbəri vəzifəsindən azad olunmasına baxmayaraq, Zelenski ilə münasibətləri dostcasına olaraq qalır.
"Bu vəzifəyə gəlməzdən əvvəl də dostum idi, bundan sonra da belə olacaq," - Yermak bildirib.
Keçmiş rəhbər əlavə edib ki, o, ABŞ Prezidenti Donald Tramp administrasiyasının nümayəndələri ilə sülh planına dair danışıqlar aparmaq üçün 29 noyabrda ABŞ-a səfər etməli idi.
Yermak deyib ki, Ukraynaya ərazilərdən imtina və NATO-dan uzaq durma tələbləri qoyulan ilk 28 maddəlik ABŞ sülh planının hazırlanmasına o, cavabdeh olub.
Onun sözlərinə görə, Ukrayna və ABŞ nümayəndə heyətlərinin Cenevrədəki birgə işi nəticəsində həmin sənəd artıq gündəmdən çıxarılıb.
Bununla yanaşı, Yermak qeyd edib ki, hələ də razılaşdırılması çətin olan bir neçə məsələ qalır:
"Hər bir halda, təzyiqlərə baxmayaraq, prezident Ukraynanın maraqlarına zidd olan heç bir sənədi imzalamayacaq və ya təsdiqləməyəcək," - o, bildirib.
Lalə Qüdrətova
Milli.Az
