Ukraynanın müdafiə naziri Denis Şmıqal və Müdafiə Nazirliyinin Baş Kəşfiyyat İdarəsinin rəisi Kiril Budanov ölkə Prezidenti Volodimir Zelenskinin ofisinin rəhbəri vəzifəsinə Andrey Yermakın yerinə namizədlər arasındadır.
Yeniavaz.com xəbər verir ki, bu barədə Ali Radanın deputatı Yaroslav Jeleznyak sosial şəbəkə hesabında paylaşım edib.
Qeyd edək ki, bundan öncə “Insider” nəşri bu vəzifəyə baş nazir Yuliya Svırıdenkonun namizədliyini bildirmişdi. Deputat Oleksiy Honçarenkonun sözlərinə görə, Svırıdenko baş nazir olaraq qalacaq, bu vəzifəyə isə rəqəmsal transformasiya naziri Mixailo Fedorov düşünülür.
Jeleznyak namizədlər arasında Svırıdenko, Fedorov, Şmıqal və Budanovun olduğunu təsdiqləyib.
“Məndə olan məlumata görə, ən çox ehtimal olunan dörd namizəd var”, - deputat yazıb.
O, bildirib ki, Zelenski Svırıdenko, Fedorov və Şmıqala güvənir. Jeleznyak hesab edir ki, yeni təyinatla bağlı qərar ən yaxşı halda bu həftəsonu veriləcək.
Xatırladaq ki, daha öncə Zelenski Ukrayna prezident aparatının rəhbəri Andrey Yermakın istefa verdiyi ilə bağlı məlumat yayıb.
