ABŞ prezidenti Donald Tramp yaxın vaxtlarda və qeyri-müəyyən müddətə üçüncü dünya ölkələrindən olan şəxslərin ölkəyə köçünü dayandırmaq niyyətində olduğunu bildirib.
Azpost.info xəbər verir ki, Tramp bu barədə özünün “Truth Social” səhifəsində yazıb. O, əvvəlki prezident Cozef Bayden dövründə verilmiş milyonlarla qeyri-qanuni giriş icazəsinin də ləğv ediləcəyini qeyd edib.
Prezident əlavə edib ki, ABŞ üçün “fayda gətirməyən” və ya ölkəyə sədaqət göstərməyən əcnəbilərin çıxarılması planlaşdırılır. Tramp bəyan edib ki, təhlükəsizlik üçün risk yaradan hər bir qeyri-vətəndaş deportasiya ediləcək və onlara federal yardımlar verilməyəcək.
Qeyd edək ki, noyabrın 26-da Vaşinqton şəhərində naməlum şəxs atəş açıb. Hadisə Ağ evin yaxınlığında baş verib. Atışma nəticəsində Milli Qvardiyanın iki əməkdaşı yaralanıb. Onlardan biri sonradan dünyasını dəyişib.
