London, 27 noyabr, AZƏRTAC
Böyük Britaniyanın Maliyyə Araşdırmaları İnstitutu (IFS) maliyyə naziri Reyçel Rivzi yeni açıqlanan dövlət büdcəsində vergiləri 26 milyard funt sterlinq artırmaqla Leyboristlər Partiyasının seçki proqramını pozmaqda ittiham edib.
AZƏRTAC “The Independent”ə istinadla xəbər verir ki, büdcə paketinə gəlir vergisi hədlərinin dondurulması da daxildir ki, bu da 1,7 milyon insanın daha çox vergi ödəməsi ilə nəticələnəcək. Büdcə üzrə Məsuliyyət İdarəsinə görə, bu dəyişikliklər ölkədə vergi yükünü indiyədək görünməmiş səviyyəyə çatdırır.
IFS bildirir ki, vergi hədlərinin dondurulması və pensiya üçün əməkhaqqı güzəştlərinə limit qoyulması nəticəsində Milli Sığorta haqları da artacaq. İnstitutun direktoru Helen Miller bu addımı partiyanın manifestosunun pozulması kimi qiymətləndirib. Leyboristlərin 2024-cü il seçki manifestində, “İşləyən insanlar üçün vergilər artırılmayacaq. Milli sığorta, gəlir vergisinin əsas, yüksək və əlavə dərəcələri, eləcə də ƏDV yüksəldilməyəcək” - vədi yer almışdı.
Helen Miller həmçinin qeyd edib ki, büdcə çox zəif təsir bağışlayır və mövcud çağırışların miqyasına uyğun ambisiya nümayiş etdirmir.
Aytən Abbaslı
AZƏRTAC-ın xüsusi müxbiri
London
