Bakı, 26 noyabr, Gülay Nəzərova, AZƏRTAC
Türk xalqlarının ortaq folklor və mədəniyyət xəzinəsində “Koroğlu”, “Dədə Qorqud”, “Bilqamış”, “Oğuznamə”, Qıpçaq türklərinin dastanları və “Manas” xüsusi yer tutur. Bu əsərlərin hamısında Vətən və torpaq sevgisi, cəsarət, mərdlik və humanistlik kimi dəyərlər ön plandadır. Bu baxımdan, türk xalqlarının birliyinə doğru atılan addımlarda həmin motivlərdən istifadə etmək mühüm əhəmiyyət daşıyır.
Bunu AZƏRTAC-a açıqlamasında tanınmış yazıçı-dramaturq, publisist, Əməkdar incəsənət xadimi Elçin Hüseynbəyli bildirib.
O, türklərin bir-birinə hörmət göstərməsi və birliyi qoruyub saxlamasının Göytürklər dövründən gələn ən qədim ideyaların davamı olduğunu deyib: “Bilgə Xaqan, Kül Tigin kimi tarixi şəxsiyyətlər və onların abidələri Türk birliyinə səsləniş kimi qiymətləndirilir. Bizim gəldiyimiz ortaq qənaət indi yönəldiyimiz böyük Turan birliyidir və bu birliyin güclənməsi üçün həmin dəyərlərin yaşadılması vacibdir”.
Elçin Hüseynbəyli qeyd edib ki, türk xalqlarının adət-ənənələri – böyüyə hörmət, elçilik mərasimləri, qız istəmə ənənəsi, yas mərasimləri bu gün də öz aktuallığını qoruyur və xalqları bir-birinə yaxınlaşdıran əsas bağlardan biridir.
“Milli kimliyimizi qorumaq və təsbit etmək üçün bizi birləşdirən bu dəyərlərdən istifadə etməli, onları gələcək nəsillərə olduğu kimi çatdırmalı və gündəlik həyatımızda yaşatmalıyıq”, – deyə yazıçı əlavə edib.
