Rusiyanın Sakit okean donanmasının “Peresvet” böyük desant gəmisi ekipajı qorunmayan yolda lövbər salarkən təhlükəsizlik və müdafiənin təşkili üzrə təlim keçirib. Döyüş hazırlığı təlimi Kuril adalarının körfəzində baş tutub.
Herbiand.az bildirir ki, bu barədə Rusiya Müdafiə Nazirliyi mətbuat yayıb.
Təlim zamanı “Peresvet” heyəti dəniz hazırlığı, minalardan müdafiə, sualtı qayıq və təxribat əleyhinə müdafiə elementlərini məşq edib.
Qeyd edilib ki, desant gəmisinin simulyasiya edilmiş düşmənin pilotsuz uçuş aparatlarından və pilotsuz katerlərindən mühafizəsinə xüsusi diqqət yetirilib. Artilleriya və pulemyot ekipajları hədəfin kəşfiyyatı, atəşin paylanması və atəşin ötürülməsi üzrə məşq ediblər.
1991-ci ildən bəri xidmətdə olan bu tip böyük desant gəmiləri gücləndirilmiş tank rotasını daşıya bilər. 12 tank və ya 17 piyada döyüş maşını, yaxud zirehli personal daşıyıcısı, həmçinin 250-yə qədər desant nəfəri aparmaq mümkündür.
Bəxtiyar CƏFƏRLİ
