Bakı, 25 noyabr, AZƏRTAC
Azərbaycanda, xüsusilə də işğaldan azad edilmiş ərazilərdə quruculuq işləri sürətlə davam edir. Bu həm də tikinti şirkətlərinin öhdəsinə ciddi vəzifələr qoyur. Tikinti şirkətləri bu tələblərə nə dərəcədə cavab verirlər?
Tikinti üzrə ekspert Anar Qurbanov AZƏRTAC-ın sualına cavab olaraq bildirib ki, Azərbaycanda, xüsusilə də işğaldan azad edilmiş ərazilərdə genişmiqyaslı quruculuq və bərpa işləri yüksək dinamika ilə davam edir.
“Dövlətimizin əsas prioritetlərindən biri olan bu proses tikinti şirkətlərinin qarşısında yeni və daha ciddi vəzifələr müəyyənləşdirir. Son illər aparılan müşahidələr göstərir ki, respublikamızda iri və təcrübəli yerli şirkətlər mövcuddur. Bu şirkətlər müasir layihələndirmə prinsiplərinə əsaslanaraq BIM texnologiyalarından istifadə etməklə, beynəlxalq standartlara uyğun tikinti materialları tətbiq edir və böyük həcmli layihələri qısa müddətdə icra edirlər. BİM texnologiyası müasir layihə, tikinti, dizayn, yenidənqurma və idarəetmə proseslərində inqilabi dəyişiklik yaradan rəqəmsal yanaşmadır. Sözügedən texnologiya layihələrin planlaşdırılması və icrası zamanı ən yüksək dəqiqliyi təmin edir, tikinti müddətini və xərcləri optimallaşdırır. BİM məhsuldarlığı artırmaqla yanaşı, ekoloji standartlara uyğun, davamlı və uzunömürlü layihələrin reallaşdırılmasını da təmin edir”, - deyə ekspert qeyd edib.
Anar Qurbanov onu da əlavə edib ki, bu şirkətlər hər gün inkişaf etməkdə və texnoloji yenilikləri tətbiq etməkdədirlər. Belə ki, “Bakı Ağ Şəhər layihəsi”ndə də BİM uğurla tətbiq olunub. Ekspert qeyd edib ki, Prezident İlham Əliyevin tikinti sektoruna dair müəyyənləşdirdiyi strateji xətt ölkədə fəaliyyət göstərən tikinti şirkətlərinin inkişafında mühüm rol oynayır: “Dövlət başçısının şəhərsalma, infrastruktur və yenidənqurma sahələrinə verdiyi xüsusi diqqət şirkətlərin daha çevik, müasir və beynəlxalq standartlara uyğun fəaliyyət göstərməsinə şərait yaradıb. Müşahidələrim göstərir ki, işğaldan azad edilmiş ərazilərdə həyata keçirilən genişmiqyaslı yenidənqurma və tikinti layihələrinin yaratdığı mövcud dinamika Azərbaycanın tikinti sektorunu regional miqyasda nümunəvi modelə çevirir”.
