"Bloomberg" agentliyi Avropa rəsmilərinə istinadən xəbər verir ki, ABŞ-nin sülh planının son layihəsində Rusiyanın dondurulmuş aktivlərindən Ukraynanın yenidən qurulması fonduna təxminən 100 milyard dollar ayrılmasını nəzərdə tutan bənd çıxarılıb.
"Yeni Sabah" xəbər verir ki, bu müddəanın götürülməsi Avropa rəsmiləri arasında nikbinliyə səbəb olub. İlkin təklifdə ABŞ-ın bu aktivlərdən əldə edilən gəlirin 50%-ni alması, istifadə olunmamış dondurulmuş vəsaitlərin isə Rusiya-Amerika investisiya fonduna verilməsi nəzərdə tutulurdu.
Aİ ölkələri dondurulmuş Rusiya aktivlərindən istifadə üçün hüquqi mexanizmlər hazırlamağa çalışır. Bu aktivlərin əsas hissəsi, yəni 200 milyard avrodan çoxu Belçikanın Euroclear platformasında bloklanıb. Depozitari dəfələrlə onların müsadirə edilməsinə qarşı çıxıb və xəbərdarlıq edib ki, bu, dünyanın başqa yerlərində Avropa və ya Belçika aktivlərinə həbs qoyulması üçün Rusiyanın hüquqi prosedurlarına səbəb ola bilər.
Rusiya liderinin mətbuat katibi Dmitri Peskov qeyd edib ki, Rusiya aktivlərinə həbs qoyulacağı təqdirdə Moskva Avropa ölkələrinin hərəkətlərinə mütləq cavab verəcək. Öz növbəsində Rusiya Xarici İşlər Nazirliyinin sözçüsü Mariya Zaxarova bəyan edib ki, Rusiyanın dondurulmuş aktivlərindən Aİ ölkələrinin Ukraynaya “kompensasiya kreditləri” vermək üçün istifadə etməsinə reaksiyası çox sərt və ağrılı olacaq./Teleqraf
Telegram kanalımız
