Qış aylarında soyuq havanın təsiri ilə qapalı məkanlarda uzun müddət qalmaq və günəş işığından daha az yararlanmaq kimi səbəblər immunitet sistemini zəiflədə bilir. Bu dövrdə qrip, soyuqdəymə, sətəlcəm və bronxit kimi tənəffüs yolu infeksiyalarında da artım müşahidə olunur.
Pravda.az bildirir ki, xüsusilə xroniki xəstəlikləri olan şəxslər üçün gündəlik həyatda tətbiq oluna bilən sadə tədbirlər vasitəsilə bu xəstəliklərin böyük bir hissəsinin qarşısını almaq mümkündür.
İmmunitetin gücləndirilməsi - Balanslı qidalanma - tərəvəz, meyvə, tam dənli taxıllar, yağsız zülal və sağlam yağlar immun sisteminin dayağıdır. C vitamini (portağal, kivi, brokoli), sink (fındıq) və D vitamini (lazım olduqda həkim məsləhəti ilə əlavələr) imtina edilməməlidir. Hər gecə 7–8 saat keyfiyyətli yuxu immunitet üçün vacibdir.
İnfeksiyalardan qorunma - Əllər sabunla ən az 20 saniyə yuyulmalı, qapalı və sıx məkanlarda maska istifadəsi, tez-tez havalandırma tövsiyə olunur. Hər il qrip peyvəndi olunmalı, 65 yaşdan yuxarı və xroniki xəstəlikləri olanlar üçün pnevmokok peyvəndi də vacibdir.
Nəfəs yollarının qorunması - Evin rütubəti 40–50% səviyyəsində saxlanmalıdır, çünki quru hava tənəffüs yollarını zədələyə bilər. Siqaretdən və siqaret tüstüsündən uzaq durmaq məsləhətdir. Gündə 1,5–2 litr su içmək, tənəffüs yollarının nəmini qorumağa kömək edir.
Xroniki xəstəlikləri nəzarətdə saxlamaq - Diabet, hipertoniya, ürək xəstəlikləri kimi xroniki xəstəlikləri olan şəxslər dərman qəbulunu, qan şəkəri və təzyiqi izləməlidir. Müntəzəm həkim müayinələri və analizlər infeksiyalardan irəli gələn riskləri azalda bilər.
Fiziki aktivlik və ruhi sağlamlıq - Həftədə ən az 3 dəfə, hər biri 30 dəqiqəlik fiziki fəaliyyət - gəzinti, qaçış və ya addım sayı (gündə 8–10 min) tövsiyə olunur. Günorta qısa yürüşlər D vitamini sintezini artırmaqla yanaşı, əhval-ruhiyyəni yaxşılaşdırmağa kömək edir.
Əminə Bayramova
