BAKI, 22 noyabr. TELEQRAF
ABŞ-nin 28 bəndlik sülh planındakı müddəalardan biri də atəşkəsdən sonra Amerikanın rəhbərliyi altında Ukraynada yenidənqurma işləri aparmaqdır. Vəsaitlər isə Rusiyanın Avropa İttifaqı tərəfindən müsadirə edilmiş, əsasən Belçikada saxlanılan aktivlərindən əldə olunacaq. Söhbət təxminən 140 milyard avrodan gedir. Kiyevin hərbi əməliyyatlarını dəstəkləmək üçün nəzərdə tutulan bu vəsaiti ABŞ yenidənqurma işlərinə sərf etmək istəyir.
Teleqraf xəbər verir ki, bu barədə "Politico" nəşri yazıb.
Qeyd olunur ki, Rusiyanın dondurulmuş aktivlərinə göz dikən ABŞ əldə edilən gəlirin 50%-nə iddia edir.
Diplomatların fikrincə, Brüsseldə danışıqlar hazırda son dərəcə incə mərhələdədir, çünki yüksək vəzifəli məmurlar dondurulmuş vəsaitlərin Ukrayna hökumətinə kredit verilməsi üçün istifadə edilməsinə imkan verən hüquqi mətn hazırlamağa çalışırlar.
AB-nin yüksək vəzifəli məmuru hesab edir ki, Tramp nə qədər istəsə də, onun Avropadakı Rusiya aktivlərini boşaltmaq səlahiyyəti yoxdur.
