“Tanınmış azərbaycanlı iş adamı Adnan Əhmədzadənin həbsindən sonra onun BƏƏ-də yerləşən şirkətinin bütün səhmləri şirkətin baş direktoru Yusif Məmmədov tərəfindən alınıb”.
Yeniavaz.com haqqin.az-a istinadən xəbər verir ki, bu barədə Sinqapur nəşri şirkətin rəsmi press-relizinə istinadən məlumat yayıb.
Məlumata görə, “Oilmar”ın sahibi ilə bağlı “hadisələr” (Əhmədzadənin həbsi nəzərdə tutulur – red.) səhmlərin geri alınması prosesini işə salıb. 
Qəzet yazır ki, “Oilmar Shipping and Chartering” son benefisiar sahibinin adını açıqlamasa da, şirkət rəhbərliyin artıq bütün səhmləri almağa başladığını və satınalma prosesinin yaxın bir neçə gün ərzində başa çatdırılmasının gözlənildiyini bildirib.
Sentyabrın 24-də sosial mediada dərc olunan şirkətin bəyanatında bildirilir ki, səhm alışı onun son benefisiar sahibi ilə bağlı hadisələr və mediada dərc olunan xəbərlərlə bağlıdır.
“Bu hallara cavab olaraq və səhmdarlarımızın maraqlarını qorumaq üçün şirkət rəhbərliyi artıq “Oilmar Shipping and Chartering” DMCC-nin bütün səhmlərinin alınması prosesinə başlayıb”, - şirkətin baş direktoru Yusif Məmmədov bildirib.
Qeyd edilib ki, Dubayda yerləşən və Adnan Əhmədzadəyə məxsus olan “Oilmar Shipping and Chartering” DMCC dəniz yanacağı və neft məhsullarının satışı üzrə ixtisaslaşmışdır. Şirkət 2015-ci ilin noyabrında yaradılıb və dünyanın 60-dan çox ölkəsində xidmət göstərir. 2022-ci ildə şirkət komandası ilk dəfə olaraq 1 milyard ABŞ dollarını keçən ümumi gəlir əldə edib.