Türkmənistan İqtisadi Əməkdaşlıq Təşkilatına (İƏT) üzv dövlətləri enerji təhlükəsizliyinin artırılması və regionda genişmiqyaslı infrastruktur layihələrinin həyata keçirilməsi məqsədilə birgə enerji siyasətinin fəal şəkildə möhkəmləndirilməsinə çağırıb.
Day.Az xəbər verir ki, İƏT 17-ci Zirvə görüşündə çıxış edən Türkmənistan baş nazir müavini, xarici işlər naziri Rəşid Meredov enerji siyasətinin əlaqələndirilməsini gücləndirməyi, enerji resurslarının idarə edilməsində vahid standart və qaydaların tətbiqini, eləcə də, bərpa olunan enerji mənbələri sahəsində əməkdaşlığın aktivləşdirilməsini təklif edib.
"Biz üzv dövlətlərin enerji siyasətinin gücləndirilməsini, bu istiqamətdə fəaliyyətlərin əlaqələndirilməsini və regionun enerji resurslarından dayanıqlı istifadə üçün vahid yanaşmanın formalaşdırılmasını təklif edirik", - deyə Meredov bildirib.
O vurğulayıb ki, Türkmənistanın enerji infrastrukturunun genişləndirilməsi və region ölkələrinə etibarlı enerji tədarükünün təmin edilməsi sahəsində əhəmiyyətli imkanları var. Prioritetlər sırasında ümumi investisiya həcmi 500 milyon ABŞ dollarını aşan enerji layihələrinin dəstəklənməsi və üzv dövlətlərə onların enerji sistemlərinin müasirləşdirilməsinə dəstək yer alır.
